Fjölskylduhlaup Ármanns og Víðavangshlaup Íslands

Víðavangshlaup Íslands fór fram í blíðskaparveðri við Þvottalaugarnar í Laugardal á laugardaginn. Sigurvegari í karlaflokki varð Kári Steinn Karlsson ÍR, Þorbergur Ingi Jónsson UFA varð í öðru sæti og ÍR ingurinn Guðni Páll Pálsson varð í þriðja sæti.  Í kvennaflokki sigraði Aníta Hinriksdóttir ÍR, Fríða Rún Þórðardóttir varð í öðru sæti og Helga Guðný Elíasdóttir Fjölni varð í þriðja sæti.

Aðrir sigurvegarar dagsins voru:

Arna Kristín Árnadóttir Ármanni í flokki stúlkna 12 ára og yngri

Björn Þór Gunnlaugsson Ármanni í flokki 13-14 ára pilta

Iðunn Björg Arnaldsdóttir ÍR í flokki 13-14 ára stúlkna

Gísli Igor Zanen ÍR í flokki 15-17 ára pilta

Andrea Kolbeinsdóttir ÍR í flokki 15-17 ára stúlkna

Daníel Einar Hauksson FH í flokki 18-19 ára pilta

Í stigakeppni félaga sigraði Ármann í flokki 13-14 ára pilta. ÍR bar sigur úr býtum í flokkum 15-17 ára pilta, 15-17 ára stúlkna, kvenna- og karlaflokki.

Heildarúrslit mótsins má finna hér.

Fyrr um daginn stóð frjálsíþróttadeild Ármanns fyrir fjölskylduhlaupi sínu á sama stað í samstarfi við garðyrkjubændur. Þar gafst áhugasömum kostur á að hlaupa brautina sem notuð var við Víðavangshlaupið. Að loknu hlaupi var boðið uppá þrautir í umsjón þjálfara frjálsíþróttadeildarinnar. Að lokum var svo boðið uppá pylsur í boði SS í brauði frá Myllunni.

Myndir af Víðavangshlaupinu og fjölskylduhlaupi Ármanns má finna á myndasíðu frjálsíþróttadeildar Ármanns – sjá hér

Morgunnámskeið í hlaupum fyrir nýliða

Í apríl og maí stendur Hlaupahópur Ármanns fyrir byrjendanámskeiði í hlaupum. Æfingarnar fara fram í Laugardalnum milli 6:30 og 7:15 á þriðjudögum og fimmtudögum. Mæting stundvíslega við Laugardalslaugina kl 06:30. Fyrsta æfingin fer fram 5. apríl. Verðið mætti kalla gjöf en ekki gjald fyrir góða heilsu eða aðeins 10.000kr fyrir 9 vikna námskeið!

Þjálfari verður Rut Sigurjónsdóttir hjúkrunarfræðingur og frjálsíþróttaþjálfari með meiru. Skráningar sendist á rutsigurjons@gmail.com

Er ekki tilvalið að taka daginn snemma nokkra morgna og koma sér þannig í gang fyrir sumarið? Muna bara að fara aðeins fyrr að sofa og mæta grjóthörð í gallanum á þriðjudaginn í næstu viku!

Byrjendanámskeið í hlaupum 15.sept.2015

Hlaupahópur Ármanns kynnir byrjendanámskeið sem hefst 15. september

Viltu reima á þig hlaupaskóna og njóta þess að hreyfa þig úti í haust í frábærum félagsskap?

Hlaupahópur Ármanns kynnir 8. vikna byrjendanámskeið sem hefst þriðjudaginn 15. september. Námskeiðið hentar þeim sem hafa lítinn eða jafnvel engan grunn í hlaupum. Markmið námskeiðsins er að þátttakendur geti hlaupið samfellt 5 kílómetra í lok þess. Á námskeiðinu fá allir æfingaráætlun sem miðast við 3 æfingar í viku.
Allar æfingar fara fram í Laugardalnum. Í upphafi æfinga hittist hópurinn við F-inngang Laugardalshallarinnar. Æfingarnar eru á þriðjudögum og fimmtudögum kl 17:30 og svo er ein heimaæfing. 
Þjálfari hópsins er Rut Sigurjónsdóttir hjúkrunarfræðingur og þjálfari hjá frjálsíþróttadeild Ármanns.Námskeiðisgjald er 10.990 kr. Allar nánari upplýsingar og skráning er í gegnum netfangið rutsigurjons@gmail.com

Hausthátið Ármanns á fimmtudagskvöld

Fimmtudagskvöldið 11. september klukkan 20:00 verður sett í Laugardalshöll Hausthátíð Ármanns 2014.

Á hátíðinni verður gert upp liðið starfsár hjá deildinni, viðurkenningar veittar en einnig horft til framtíðar og skipulag þjálfunar næsta starfsárs kynnt.

Hátíðin var haldin í fyrsta sinn fyrir ári. Myndir frá samkomu síðasta árs má sjá hér.

Ármannshlaupið 2014 – Kári Steinn og Agnes Íslandsmeistarar

Íslandsmeistarar2014

Kári Steinn Karlsson og Agnes Kristjánsdóttir fögnuðu sigri í Ármannshlaupinu sem þreytt var í kvöld en hlaupið er einnig Íslandsmeistaramót í 10 km götuhlaupi.

Alls hlupu 450 keppendur 10 km leiðina frá Sundahöfn út að Hörpu og til baka og kom Kári Steinn fyrstur allra í mark á tímanum 30 mínútur og 29 sekúndur, sem jafnframt er nýtt brautarmet. Um tveimur og hálfri mínútu á eftir honum var Ingvar Hjartarson og þriðji í karlaflokki á rétt rúmum 33 mínútum varð Guðni Páll Pálsson.
Agnes var 38 mínútur og 59 sekúndur að fara vegalengdina, tæpri mínútu þar á eftir kom önnur kvenna í mark Andrea Kolbeinsdóttir og þriðja varð svo Eva Skarpaas Einarsdóttir á 41 mínútu og 31 sekúndu.


Sigurvegarar í öðrum aldursflokkum voru:
Konur 18 ár og yngri – Andrea Kolbeinsdóttir, ÍR 39:50
Karlar 18 ára og yngri – Þór Daníel Hólm, Ármann 36:48
Konur 19 til 39 ára – Agnes Kristjánsdóttir  38:57
Karlar 19 til 39 ára – Kári Steinn Karlsson, ÍR  30:28
Konur 40 til 49 ára – Eva Skarpaas Einarsdóttir, ÍR 41:31
Karlar 40 til 49 ára – Kristján Sigurðsson  36:51
Konur 50 til 59 ára – Berglind Jóhannsdóttir  44:51
Karlar 50 til 59 ára – Ívar T. Jósafatsson, Ármann 36:22
Konur 60 ára og eldri – Kristjana Bergsdóttir  56:37
Karlar 60 ára og eldri – Kjartan B. Kristjánsson  45:23
 

Ármannshlaupið 2014

Armannshlaupid2014

Miðvikudagskvöldið 9. júlí kemur í ljós hverjir eru bestu götuhlaupararnir….
 
…því þá fer Ármannshlaupið fram, með góðum stuðningi Eimskips, sem er jafnframt er meistaramót Íslands í 10 km götuhlaupi. Þetta þýðir þó ekki að minni spámenn eða byrjendur þurfi að halda sig til hlés, því hlaupaleiðin er með þeim léttari og fékk hlaupið afar góða umsögn á hlaup.is í uppgjöri síðasta árs. Allar upplýsingar má finna hér á síðunum fyrir neðan og nú er ekki eftir neinu að bíða heldur bara að skrá sig, það tekur enga stund og er mun ódýrara en að gera það á mótsdegi!

Mótanefndin

Víðavangshlaup Íslands og Fjölskylduhlaup Ármanns og grænmetisbænda

Það verður nóg um að vera fyrir hlaupfúsa fætur í Laugardalnum á laugardaginn! Frjálsíþróttadeild Ármanns hefur daginn með Fjölskylduhlaupi Ármanns og garðyrkjubænda. Mæting í Fjölskylduhlaupið er kl. 9.45 við Þvottalaugarnar í Laugardal. Hlaupaleiðin er um 1,5 kílómeter. Að loknu hlaupi verða veitingar í boði Sölufélags garðyrkjumanna. Það kostar ekkert að taka þátt í hlaupinu.

 

Kl. 11 hefst svo Víðavangshlaup Íslands á sama stað. Þar er keppt í öllum aldursflokkum beggja kynja. Jafnframt er keppt um stigabikar í hverjum aldursflokki fyrir sig. Nánari upplýsingar um Víðavangshlaup Íslands má finna hér, tímaseðil má sjá hér. Hlaupaleiðina má sjá hér, í lengri hlaupum dagsins bætist við 500 metra hringur sjá hér.

Næring hlauparans

Eftir æfingu á þriðjudegi bauð Elísabet Margeirsdóttir, ofurhlaupari og næringarfræðingur M.Sc., hlaupahópnum upp á fyrirlestur þar sem hún fór yfir næringarþarfir þeirra sem stunda reglubundna hreyfingu.

Á fyrirlestrinum fjallaði Elísabet vel um almenna næringarfræði og talaði út frá því að hverju fólk sem æfir reglulega, þ.e. nokkrum sinnum í viku, þarf að gæta að í mataræðinu. Hún fór svo sérstaklega yfir hvernig það álag sem fylgir reglubundnum hlaupum hefur áhrif á orkubúskap líkamans og niðurbrot.

Með tilliti til þess sagði Elísabet frá hvernig aðlaga þarf mataræði til að uppfylla orkuþörfina sem hlaupurum er nauðsynleg. En mjög mikilvægt er einnig að huga að endurheimt eftir æfingu og gaf Elísabet góð ráð um hvernig þarf að gæta að næringarþörf eftir æfingu svo líkaminn fái allt sem þarf til að byggja upp það sem æfingaálag brýtur niður svo æfingin skili sínu og hlauparinn komi sterkari inn í næstu æfingu.

Fyrirlesturinn var mjög vel fluttur. Tók hópurinn mikinn þátt og sköpuðust líflegar umræður bæði á meðan Elísabet flutti mál sitt og á eftir.

 

Viktor Orri valinn úr hópi efnilegra Ármenninga

Glímufélagið Ármann verðlaunaði í gær unga og efnilega íþróttamenn sérstaklega. Viðurkenningar fengu þeir sem útnefndir höfðu verið efnilegastir í sinni deild. Erfitt verk hafði dómnefnd með höndum, að velja á milli ólíkra einstaklinga úr ólíkum íþróttum.

Efnilegustu íþróttamenn hverrar deildar eða þeirra fulltrúar. Þór Daníel Hólm, þriðji frá vinstri, tók við verðlaunum f.h. Viktors Orra æfingafélaga síns.

Sá sem varð fyrir valinu heitir Viktor Orri Pétursson, upprennandi millivegalengdarhlaupari úr frjálsíþróttadeild. Viktor Orri er Seltirningur, fæddur 1997. Hann hefur æft handknattleik og knattspyrnu með Gróttu, en einbeitir sér nú að millivegalengdarhlaupum. Eins og kom fram hér á síðunni náði Viktor Orri nú undir lok árs lágmarki fyrir Úrvalshóp FRÍ. Viktor Orri æfir undir stjórn Dr. Erlings Jóhannssonar Íslandsmethafa í 800m hlaupi. Framfarir hans á önninni undir stjórn Erlings hafa verið miklar.

Árangur Viktors Orra í keppni árið 2013

  • 1. sæti á MÍ 15-22ja ára í 800m og 1500m hlaupum
  • 1. sæti í 10km í Ármannshlaupinu.
  • Reykjavíkurmeistari í sínum aldursflokki á besta tíma ársins.
  • 4. sæti í 10.000,- metra hlaupi á braut í flokki fullorðinna.
  • Reykjavíkurmaraþon, 2. sæti í sínum aldursflokki.
  • Reykjavíkurmeistari í 400m hlaupi á 55,62s
  • Sigurvegari á Silfurleikum ÍR í 800m hlaupi.
  • Reykjavíkurmeistari í 1500m hlaupi í sínum aldursflokki.
  • Sigurvegari í Hjartadagshlaupinu 5km.

Staða Viktors Orra á afrekaskrá FRÍ, í sínum aldursflokki

  • 800m hlaup, 1. sæti í sínum aldursflokki.
  • 1500m hlaup, 1. sæti í sínum aldursflokki.
  • 3000m hlaup, 1. sæti í sínum aldursflokki.

Viktor Orri og Ernir bæta sig

 
Viktor Orri og Ernir Jónsson

Viktor Orri Pétursson og Ernir Jónsson kampakátir á æfingu í dag.

Viktor Orri Pétursson og Ernir Jónsson reimuðu á sig gaddaskóna um helgina fyrir 800m hlaup á Silfurleikum ÍR. Það var vel þessi virði því þeir bættu sig báðir mikið. Viktor Orri sigraði í flokki 16-17 ára á tímanum 2:01,93. Viktor bætti með þessu eigin Ármannsmet. Ernir varð annar á 2:03,68. Sjá úrslit hlaupsins hér.

Tíminn er fínn á miðju uppbyggingartímabili hjá strákunum. Þeir æfa nú ásamt Þór Daníel Hólm undir stjórn Erlings Jóhanssonar. Upphaf samstarfsins lofar góðu.

Með hlaupi sínu náðu báðir lágmarki inn í Úrvalshóp FRÍ. En lágmarkið er 2:05,0 fyrir þeirra árgang, 1997.

Tími Viktors Orra er sá sjöundi besti frá upphafi samkvæmt afrekaskrá. Hann nær að lauma sér inn á milli bræðranna Sveins og Björns Margeirssona. Þó er rétt að taka fram að þeir bræður unnu sín afrek á krappri 100m braut.

armannfrjalsar á Instagram

Aðventumót Ármanns