Frjálsar.is

Um helgina eignuðumst við 2 Norðurlandameistara 19 ára og yngri. Aníta Hinriksdóttir úr ÍR gerði sér lítið fyrir og vann 800m hlaupið með tímann 2:08,64mín sem er góð bæting hjá henni. Þetta er sérstaklega frábær árangur því hún er aðeins 15 ára og var því mun yngri en allar hinar sem voru að keppa.
Sveinbjörg Zophaníasdóttir úr USÚ varð Norðurlandameistari í langstökki með stökk uppá 6,08m. Hún náði því að hefna sín fyrir silfrið sem hún náði í fyrra á NM 19 ára og yngri sem haldið var á Akureyri.

Nokkur met féllu, bæði aldursflokkamet og persónuleg met.
Hægt er að sjá nánari fréttir um úrslit mótsins á heimasíðu FRÍ.

Ingi Rúnar Kristinsson (Breiðablik) kom öllum og líklega sjálfum sér mest á óvart þegar hann flaug yfir 4,69 metra í stangarstökki á meistaramóti 15-22 ára sem haldið var á Akueyri um helgina og setti íslandsmet í flokki pilta 18 - 19 ára. Fyrir mótið um helgina átti Ingi Rúnar best 4,40 metra í stangarstökki sem hann hafði stokkið á Bikarkeppni FRÍ í sumar.

Flottur árangur náðist í mörgum öðrum greinum þó ekki voru metin fleiri þessa helgina.

Bikarkeppni 15 ára og yngri fór fram á sunnudaginn við ágætis aðstæður í Hafnarfirði. Gríðarlega góð þátttaka var á mótinu en tíu lið voru skráð til leiks og þar af komu fimm lið utan af landi.

Þetta er í fyrsta sinn sem haldin er bikarkeppni fyrir iðkendur 15 ára og yngri en áður fyrr var keppni leyfð þátttakendum 16 ára og yngri.

Lið ÍR sem hefur sigrað í heildarstigakeppninni síðastliðin tvö ár hélt sigurgöngu sinni áfram þriðja árið í röð. ÍR endaði stigakeppnina með 169 stig eða 26,5 stigum fleiri en FH sem endaði í öðru sæti. Sameiginlegt lið UFA/UMSE varð svo í þriðja sæti.

Í piltakeppninni sigraði ÍR örugglega en hjá stúlkunum bar FH sigur úr bítum eftir gríðarlega harða keppni við HSK og ÍR.

Snorri Sigurðsson og Ólafur Konráð Albertsson héldu til London í keppnisferð í vikunni. Þeir kepptu á tveimur mótum, Snorri keppti í tvisar í 800m meðan Ólafur keppti í 800 og síðan 1500m á seinna mótinu.

Snorri stóð sig mjög vel og bætti sinn besta árangur og hljóp á 1:53.02sek á fyrra mótinu sem að er 6 brota bæting utanhúss. Seinna mótinu hljóp hann á 1:54.4sek.

Ólafur átti ekki alveg eins góða daga, hljóp 800m á 1:58 og 1500m á 4:05. Gera má ráð fyrir því að Snorri keppi þá í 800m um helgina á Bikarkeppni FRÍ. Þar verður gaman að sjá hann takast á við Bjartmar Örnuson (Norðurland) og Kristinn Þór Kristinsson (HSK)